ნაწარმოებები


გამარჯვებას ვუსურვებთ გმირ უკრაინელ ხალხს რუს აგრესორზე.     * * *     დიდება უკრაინას !!! Сла́ва Украї́ні !!!

ავტორი: ბალახა
ჟანრი: პოეზია
1 თებერვალი, 2014


გაბონი და ნამიბია.

მე, ვისაც შენზე ოცნებაში ორი ღამეც კი,
ჩემო ძვირფასო ვერასძალით გადამიბია...
ყველა სიზმარში შეგექცევი, როგორც ხამანწკას,
ხარ უფრო შორი, ვიდრე გაბონი და ნამიბია.
მე, ვინც თვალებში მოგიშენა ორანჟერეა,
სულის შიგნიდან ამოყვანილს გირგავ ლილიებს...
ყველა ხმაური უსახლო და უნიჟაროა
და სიჩუმე კი-მეტი წილი ჩემი ფსკვნილია,
რომელსაც მუდამ დავატარებ: დოღზე, მეტროში
ან უმიზეზოდ გამოვდივარ, როცა სახლიდან...
როცა იზრდება მწუხრის პირზე ღამის რეტუში,
როცა მეზობელს მივაგინებ თავის ძაღლითურთ,
ვისი ადგილიც მეგულება სადმე გადაღმა,
სადაც ნაკლები ხეებია და ქრის დებოშით:
სამუმი, სარმა, სიროკოზეც მე ვარ თანახმა,
ოღონდ არ მოფსას ფეხაწევით ვიწრო კორომში.
მე, ვისაც სული, სრული წონით სადღაც ორი გრამ
ნახევარი და უფრო ხშირად სამიც გამომდის...
შევეკედლები ინფლაციით დაღლილ ორიგამს
და ყველა ქაღალდს მოგამსგავსებ ხვალ საღამომდე.
მე, ვისაც შენზე ოცნებაში ორი ღამეც კი,
ჩემო ძვირფასო ვერასძალით გადამიბია...
ყველა სიზმარში შეგექცევი, როგორც ხამანწკას,
ხარ უფრო შორი, ვიდრე გაბონი და ნამიბია.

კომენტარები ილუსტრაციები რეცენზიები