...ნეტავ რად დამდევდა ფიქრებით გათანგულს,
რას ჩამჩურჩულებდა ჯიუტი ოცნება,
საოცარ სიზმარში ალისას დაკარგულს
ღამე გამითიეს უბადლო მგოსნებმა...

წვიმამ დამინისლა თვალები წვეთებით,
სხივები მათბობდა იმედად ხვალისა,
ცრემლებში ჩაკარგულს რა მომდის ვერ ვხვდები,
ბნელში დავაბიჯებ მთვარიან ღამისას...

შორით გამოსჭვივის ცდომილი სინათლე,
მიზიდავს მაგია ვარსკვლავთა ციალის,
ჩამესმის ჩურჩული, ვერ ვხვდები სიმართლეს,
ეს ხმა გულისაა თუ ხეთა შრიალის.

ნეტავ სად ქრებიან ცოდვილი მუზები,
კვლავაც ჩამჩურჩულებს ჯიუტი ოცნება,
საოცარ სიზმარში ალისას დაკარგულს
ღამე გამითიეს უბადლო მგოსნებმა...