ნაწარმოებები


გამარჯვებას ვუსურვებთ გმირ უკრაინელ ხალხს რუს აგრესორზე.     * * *     დიდება უკრაინას !!! Сла́ва Украї́ні !!!

ავტორი: სამუმი
ჟანრი: პოეზია
26 ნოემბერი, 2014


Deus Ex Machina

მარტოსულ გუბეებს ბაყაყი ამდორებს,
დღეები ერთმანეთს უმსგავსოდ ერთვიან...
ყოველი ყუთიდან მიცქერის პანდორა
და ყველა მანქანა უცნობი ღმერთია!
აკრძალულ სახლიდან სიყვარულს ვისესხებ,
რომ ალაპარაკდნენ ენაბლუ დენდები...
როდესაც სუიციდს დაფარავს მიზეზი,
ვინღა მომიგონებს, ვის გავახსენდები?!
გარდასულ წუთიდან მოტივებს ამოვკრეფ,
მოტივებს-რაღაცა რომ უნდა მეწერა;
შემდეგ "დაბადებას" დავარქმევ აპოკრიფს,
დანარჩენს დარჩება აკვნად et cetera.
მეწვევი მთვარიდან ვარდისფერ სათვალით,
შუადღის ძილივით მყუდრო და სათუთი...
3-ის ჯერადივით ვარსკვლავი დავთვალეთ,
შევცდით და ამბორი ვერ დავასაბუთეთ.
მარტოსულ გუბეებს ბაყაყი ამდორებს,
დღეები ერთმანეთს უმსგავსოდ ერთვიან...
ყოველი ყუთიდან მიცქერის პანდორა
და 3-ის ჯერადი უცნობი ღმერთია!

კომენტარები ილუსტრაციები რეცენზიები