არ მიყვარს ყვავილები - გვირილის რა ბრალია,
თუკი მე ცხოვრებამ ვერ გამაყვავილა,
მიყურებ გაკვირვებით, - "ქალი ხომ ქალია,
ნუთუ თაიგულმა არ გაახალისა?!"
მე მარქმევ უცნაურს  და უბის წიგნაკში,
არეულ-დარეულს მივაწერ სტრიქონებს,
მაინც კაცი ხარ და ვერ ამოგიხსნია
ფიქრობ, ტრაგედიას ლექსივით იგონებს...
არ მიყვარს ყვავილები -ფერების ტრიალში,
ტილოზე ჩამოვუშვი ფუნჯი ვით ანკესი,
ქალი ხომ ქალია, მიცქერი თვალებში,
ამ სულის სიღრმის კი არადა არ გესმის...

მიყვარდა ყვავილები, ვეტრფოდი გაზაფხულებს,
გვირილას დავაცალე ფოთლები ნაპირთან,
არ მინდა ყვავილები - იმედებს დაზაფრულებს,
სულ ეყვარებიო - ტყუილად დაპირდა...