რუსთან აყოლილი ავსულები
კლდიან ბილიკებით მომყვებიან,
წამლის დარჩენილი კაფსულებით
ვითვლი გასულ დღეებს… მოკლდებიან
გასათეთრებელი ღამეები.
მე ან უშენობით მოვკვდები, ან-
შენი მოჭარბებით! ან ეგ თმები,
ან ეგ ტუჩები, ან_ ლოყები, ან_
მკერდის კონტურები გამათავებს…
მერე ლეგენდებად მოგვყვებიან,
(მე რომ თეთრ კიბეებს ავათავებ)
მერე დისკუსიებს გამართავენ,
მძიმედ ჩაჰკიდებენ ამაყ თავებს…
მალე თუ არ გნახე, შაბათამდე,
კვალში ავსულები მომყვებიან…