ამ გალავნების როგორ არ მწამდეს
-------
ამ გალავნების როგორ არ მწამდეს,
გულში არ დამრჩა ოდნავი ეჭვი,
საქრთველოში ამაყი ცამდე
ციხესავით დგას პატარა კენჭიც...

ცისარტყელები მომავალს წერენ,
ჭექა-ქუხილის ფეთქდება ნაღმი,
სულ პაწაწინა წვიმების მერეც
კიდობანსა ჰგავს ყოველი სახლი...

წრიოხის, გორის, ბებრის, ხერთვისის
ქარი ნაომარ ჭრილობებს იხვევს,
საქართველოში ყველა კენჭივით
თავმდაბალია მაღალი ციხე...

მზეს გააღვიძებს მამალი დილით
-----
მზეს გააღვიძებს მამალი დილით,
აჩოჩქოლდება სიცოცხლე - ზავი...
და მე ხელს ვუქნევ სუყველა ბილიკს
ამ მარადიულ, უშიშარ მგზავრებს...

ჩემს ქოხს არ ტოვებს პატარა ღელე,
ყელზე შეაბეს საძოვრებს ზარი
და წვიმით ნაწერ ფერწასულ დღეებს
სულ ფურცელ-ფურცელ კითხულობს ქარი...

შობის წმინდა ღამე
-----
შობის წმინდა ღამე
გავათენოთ ერთად,
მოდის სამი მეფე,
მოაქვთ სამი ძღვენი,
მკერდში გამალებით
განა გული ფეთქავს,
ქრისტე გვიკაკუნებს
-კარი გამიხსენით...

მზე არ გვტოვებს წუთით
- უცნაური მგზავრი,
გვამხნევებენ მთები
-მოციქული ძმები...
აბრაამის მიერ
შეწირული კრავი
დღეს ჩვენს მკერდში გალობს
- კარი გამიხსენით...

***

ვიწრო ბილიკი
ათას ენას
უღვიძებს მადას,
ყოველ ნაბიჯზე
ჩამუხლულა
ციხის ნაშალი,
ჭორიც ქარია,
სულ ზურგიდან
გიბერავს რადგან
და ისღა გრჩება
- ლექსი, როგორც
აფრა გაშალო...


დალი მიხედავს,
-იდიდოს დ ე ე!
კლდისფერ ჯიხვებს და
ჯიხვისფერ კლდეებს.

ქალღმერთი გასცდა
ნისლიან შორეთს,
ქორისფერ ცას და
ზეცისფერ ქორებს