ცხოვრება აბრეშუმის ჭიისა

  ის იკვებება თუთის ფოთლის ნედლი სიმწვანით
რაც ეკოლოგიურად სუფთაა და უსაფრთხო
ჭამს მშვიდად და აუჩქარებლად საქმის მცოდნე კაცის
თავდაჯერებით.
ასეთ დროს ფიქრობს მარტო სასიამოვნო თემებზე.
ცხოვრობს ცხოვრების ჯანმრთელი წესით
აბრეშუმის ჭია – ჯანმრთელი.

ცოცავს ფოთლიდან ფოთოლზე შეუსვენებლად
(საქმიანი კაცის სიმშვიდით)
საკუთარი ნერწყვიდან ამზადებს ძაფს.
ნაზად ფაფუკსა და გამძლეს (კონკურენტუნარიანს)
აბრეშუმის ჭია - მაშვრალი.

უფრო მოგვიანებით ამ ძაფისაგან იქსოვს ჭურჭელს
თავისი ზომის შესაბამისად, რომელიც ჭირდება სახლად
(სიცოცხლეში) და სარკოფაგად (სიკვდილის შემდეგ)
ასეთ დროს ფიქრობს ცხოვრების ამაოებაზე
აბრეშუმის ჭია - ფილოსოფოსი.
იძინებს მშვიდად, უდრტვინველად, ვალმოხდილი,
რადგანაც იცის, რომ მისი სხეულის ყავისფერი არარსებობიდან
აღმოცენდება ფრენის სურვილი, რომელსაც ექნება პეპლის მსუბუქი
ფრთები და მტკიცე ჟინი ვიწრო საკნიდან გაღწევისა
აბრეშუმის ჭია - პოეტი.
    2009