ლიმონის ტივტივა კიდეს ეხეთქება -
ვახველებ სისხლს
და ურიტმო სტრიქონებს,
რომლებსაც ფილტვებში თვეობით ვიგუბებ.

გაწვიმდეს.
გაგიჟდეს ზაფხულის საღამო
სახეზე,
სხეულზე,
და თითის წვერებში -

გაწვიმდეს.
სულში ყველა მონარჩენი
სიმი რომ გაწყვიტოს
და ჩემში გაორდეს
გრძნობა და ტკივილი -
გაწვიმდეს.

ქარის წისქვილები ლეწავენ ღამეს
და ნამსხვრევებს თვალებში გვაყრიან -
ჩვეულ კალაპოტს ფიქრები არ თმობენ.

გაწვიმდეს.
გაგიჟდეს
და ჩამომერეცხოს
სისხლძარღვებამდე ჩამჯდარი სიმძიმე
და შენი განცდა -

გაწვიმდეს.

როგორც ნაწვიმარზე ძველი იარა,
ძვლებში მტეხს ლოდინი
და შენზე არფიქრი.