ყელში სიბნელე ჩამოწვა.
მატლები თვალებიდან გაიქცნენ და მოკიაფე ვარსკვლავების ნამცეცებიც თან წაიყოლეს. ალბათ, გზაში შეჭამდნენ. მუცლებს ამოიყორავდნენ, გასივდებოდნენ და ჰელიუმით გაბერილებივით კოსმოსისკენ აიღებდნენ გეზს.
კანკალი.
სიცივესა და სხეულს შორის სქესობრივი აქტი მიმდინარეობს. ცხრა წუთში გონება მშობიარობას იწყებს.
იბადება ტკივილი, შავ-თეთრი კიდურებითა და მთლიანად სხეულით.  ლურჯი თმით, ნახშირისფერი თვალებით და ინდიგო ბავშვივით მოიისფრო აურით, რომელიც გიზიდავს და გაიძულებს მაზოხისტურ სურვილებს დაემორჩილო.
იბადებიან შიშები, სხვადასხვა ფერის, აურის. სხეულზე გველებივით მოცოცავენ და თმებში გიძვრებიან. მკერდზე წყლის წვეთებივით შეშდებიან და ზანტად მოძრაობენ.
რაც უფრო ბნელდება, მით უფრო იძირები ბლანტ სითხეში, რომელშიც აღარც კი ჩანხარ. ტოვებ მხოლოდ ლურჯ ნამცეცებს და შენს თმაში ჩაღვრილ შორეული ტყეების სურნელს.