დღეს მხოლოდ თეთრი! ყველაფერი თეთრი მომართვით: კაბა და ღვინო, ყვავილი და თავსაბურავი.
მე, ჩემო კარგო, აისბერგში მინდა სამარე .
იქ ჩამასვენე წითელი კაბით და ყინული გადამაფარე.
თეთრი კაბა და თავსაბურავი გაშალე აფრად .
გამიშვი ზღვაში. ვიდრეიფო უნდა ტალღებში. ყველა მიქცევა და მოქცევა უნდა ვიგემო. მინდა სამყაროს შემოვუარო , თვითონ დავრწმუნდე, რომ არის მრგვალი.
არ მჯერა სხვების.
მთელი ცხოვრება უფსკრულები მხვდებოდა მხოლოდ და კუთხეები. ან აზიდული ღმერთამდე მთები.
გამიშვი ჩემო!
მოვიარო უნდა სამყარო. ცივი და თეთრი.სითბო შენთან ისეც არ მაკლდა, მაგრამ თბილ ფერებს ვერ გავუძელი.
შენ ისიც იცი, მზე რომ ვერ მათბობს. ზაფხულშიც მცივა,
თუ სიცივეა, ცოტა სითბოს, ყინვა სჯობს, მგონი.
გადმომაწოდე თეთრი ღვინო, თეთრი თასიდან უნდა დავისხა და აისბერგში დავიდო ბინა.
შავ ზღვას გავცდები... აისბერგში წითელი კაბით და თეთრი კაბა გაიშლება ქარში კლევერად.
უნდა ვიცურო, ჩემი ზმანების ქვეყანაში სანამ არ მივალ.
ავცილდე უნდა რიფებს, მეჩეჩებს... და აისბერგი ტალღებს გაკაფავს.
მაგრამ თუ მაინც ფსკერისკენ წავალ,
შენ ნუ იდარდებ!
მარჯნის საყურე მოუხდება ჩემს წითელ კაბას.

მოდი და თავი მომადე მკერდზე.
უკუღმა დათვლას ვიწყებთ თავიდან
ორმოცი...
შვიდი და...
სამი და,
ორი და,
ერთი და
ცხოვრება გრძელდება.
სიცოცხლე გავიდა.

ზურგის ქარი მისურვე , ჩემო!
და შემაცურე .
შენ, სიღრმეებში ნუ შემოხვალ! ზღვა ყველგან ზღვაა ...
ზღვა ნაპირიდან იწყება... იცი!