ვიღა უსმენს, ძვირფასო "კარმენსა" და "აიდას",
რაღა დროის გუნოა, სკარლატი და ვივალდი...
დღეს წყვილები იგებენ ერთმანეთის id-ებს,
skype-დან ეტრფიან, მე კი ცოცხლად მიყვარდი.
ვინ კითხულობს,ძვირფასო ბოდლერსა და ბასიოს
ან რა მოსატანია: გოეთე და თაგორი...
ჩემნაირი პოეტიც ალბათ ერთი ასია,
მე კი ყველა საღამოს თითო სურვილს ვაგორებ,
როგორც ნარდის კამათელს, უჩვეულო აზარტით,
სურვილები უძარღვო ფოთლებივით მიცვივა...
გულში შენი ადგილი ვეღარაფრით გავზარდე,
დეკემბერთან დავზავდი სუსხითა და სიცივით.
ვიღას მოაგონდება მილოსელის ქანდაკი,
საერთოდაც ხელები ერთურთს ვეღარ შველიან...
ნადირობა დამჩემდა, მცხეთა, კერძოდ ქანდა კი,
სადაც უხვად შეგხვდება ნიამორი, შველი ან
გადამფრენი შავშვები და არ ვიცი როდემდე
გავძლებ ასე უძილოდ და ღრმა დეპრესიულად,
არასოდეს მიცდია, იქნებ გაგიბოდლერდე?
ვგონებ, მაინც ვერ მივალ ვნების ექსპრესიამდე.
რა აზრი აქვს, ძვირფასო, "კარმენსა" და "აიდას",
რაღა დროის გუნოა, სკარლატი და ვივალდი...
დღეს წყვილები იგებენ ერთმანეთის id-ებს,
skype-დან ეტრფიან, მე კი ცოცხლად მიყვარდი.