(უხსოვარი სავარჯიშოები)

ჩემი ურემის მე ვარ მეეტლე
................................................................
ყველა თქვენგანში დაძრწის დემონი
ყველა თქვენგანთან დგა ანგელოზი
მე კი ავ-კარგის დამსკდარ ბომონთან
უფლის ხელისგულს ისე ველოდი
..................................................................
ვით მამლის ყივილს საბრალო პეტრე...

......
მიხშობენ ისე ლოცვანი წყურვილს
წყურვილს ლოცვანი ისე მიხშობენ
ღვთისმშობელს როგორც ეშმაკურ სურვილს
სურვილს ეშმაკურს როგორც ღვთისმშობელს...
სული მაწამებს ისე ძალუმად
ძალუმად ისე მაწამებს სული
ურჩხული ქარი როგორც ალუბალს
ალუბალს როგორც ქარი ურჩხული...

...
სხეულმა შეხედა სისხლებს და სახელოს
ბოლოდან დაეშვა გველების ფანტომი
ზეწრების გროვაში სურს რომ გაახელოს
გრძნობები რომელთაც აქვთ პალიასტომი...
ეს მრუში ძარღვები ატომებს ართობენ
იღლება უღელი ადამის, კაენის
და როგორც გრიგალი იწყება ბართლომე
გიშერი ბურუსით ირწყვება ხალენი...
ცისფერი ხალენი ნიშანი სიმაღლის...
პირაღმა ვწევარ და ვეცლები პირმაღებს
ნერვიულ თითებს რომ კანკალით მიმაღლი
იმ ღამეს, იმ ღამეს, იმ ღამეს, იმ ღამეს...


...                                                                                დოვინ დოვენ დოვლი
როგორც ათასი შენც იწყებ ქროლვით
ოღონდ ვერ გითრთის ქალივით ხელი...
წაიკითხავენ მზერაში ქორებს
თუ მუხლისთავში გიცოცხლეს მგელი...
იცი... შენ ხვდები სად დგას ეშმაკი
ამიტომ უფრო შენს თავზე ბრაზობ
და ვერ გიგებენ... მას შემდეგ რაცკი
უთენებელის გასწიე რაზა...
მე ჩემი სულის სურნელი ვიცი
პატარა ჩიტსაც ვერ ახვევს თავბრუს
დაკარგულ ბავშვებს ვით ჟილ დე რეცი
ისე მეძახის ბებერი ავბუ...
რა გინდა ავბუ, რას მერჩი ავბედს
ტაბუუ... ყმუიან ცრუთა ხახები...
ოდესმე მაინც სიმართლეს გავბედ
ოღონდ ჯერ მათი მეფე გავხდები...