ღამდება...
აქ, დაბლა, ანთებენ ელექტრო-ნათურებს.
ცაზე კი მთვარეს მოელიან ჩვეულ მონატრებით,
ისიც კვლავ მოვა და დადგება, როგორც მენატურე,
და შეესევიან მის სხეულს ქალაქის მხატვრები.

ღამდება...
რაც ნიშნავს იმას, რომ იღვიძებს პოეტი.
მასაც პირდაპირ აქვს გაბმული კავშირი მთვარესთან.
ვინ დათვლის, რამდენი კატრენი, რამდენი სონეტი,
სწორედ მთვარის შუქზე ნაწერი მისვლია ადრესატს.

ღამდება...
და როცა იძინებს სრულიად სამყარო,
სწორედ მაშინ შლიან ისინი კალმებს და მოლბერტებს,
და მხოლოდ დრომ იცის მათი შრომის ზუსტი საწყაო,
მხოლოდ დრო აფასებს ჭეშმარიტ მხატვრებს და პოეტებს!..