სასწაულს ხედავ
---------------

გალობა ისმის დილის ნისლიდან
და მიღმის მიღმა ბრწყინავს სათავე
კვლავ უკვდავების წყაროს მიზიდავ
კვლავ აუმღვრეველ დარში მატარებ.

ხმებით ეწვდება მწვერვალს ზეგანი
ზეცას ლოცავენ მზე და მერცხლები
და მარადიულ ფერებს შეხარის
გული-ნაცემი დარდის წკეპლებით.

სასწაულს ხედავ ჩუმად მოვლენილს
და აშრიალებს თქორი ლელიანს
გეხმიანება ექო რომელიც
სამყაროს შექმნის დროინდელია.

ვერ გაუხუნა სევდამ ხალისი
და ხარობს მწირი-ღმერთის ნაწილი
სიკვდილ-სიცოცხლის ერთგულ მგზავრისთვის
სამოთხისაკენ გზაა გახსნილი.