უძრავად ზიხარ
ოთახის ცენტრში-

მხოლოდ თვალებსღა ახამხამებ
დროგამოშვებით

სხეულის ნებისმიერ მოძრაობას
შეუძლია გაგცეს-

ასეთ დროს მუხლების კანკალი,
ხელების თვალებზე აფარება,
კბილების ნერვიული ღრჭიალი-
მომაკვდინებელია

თუ გაიგო რომ მგრძნობელობა
ჯერაც შეგრჩა
ყოველნაირად ეცდება მოგსპოს

არ გაინძრე
არაფერი შეგეშალოს

"დამალობანას" დიდები
ასე თამაშობენ-

ტკივილით შეშლილ თავიანთ სულებს
თავიანთ სხეულებს უმალავენ