4.  ღმერთო,  მომასწარ!..


ჩვენი  ნიკა,
ნიკალა,
ნიკოლოზი,
ნიკო,
ისეთია,
თითქოს  ცით
ანგელოზი  იყოს.

რა  თვალები,
რა  ღიმი,
ან  რა  ოქროს  თმები!..
რა  მაჯები  -  ტორები!
რა  საგმირო  მხრები!..

ხასიათი  -  ღვთიური!
მზე  და  ვარდი  პირზე...
სიცოცხლეა  -  ზღვისფერი
თვალებით  რომ  გიმზერს!..

სხვა  რა  გითხრათ -
საწერად
წლები  არ  მეყოფა...
ღმერთო,  ერთო -
მომასწარ
ნიკას  ნათელ  მყოფადს!!!

1995. 10.

 
5.    პატარა  სასწაული

ჯერ  არ  იცის  ნიკამ  ,,დედა”,
ჯერ  არ  იცის  ნიკამ  ,,მამა”,
ნიკამ  იცის  ტკბილი  ძილი,
იცის  მადიანი  ჭამა.

ნიკას  უყვარს  ხილის  წვენი:
ვაშლის,  ატმის,  ბროწეულის;
ნიკასა  ჰყავს 
სათამაშო
მხეცუნების
ოცეული;

ნიკას  უყვარს  ყურცქვიტები,
დათუჩები  და  ციცები;
ნიკას  უყვარს  სიმღერები
და  სანთლებთან  ლაციცები;

ნიკასა  აქვს  სილამაზის
გრძნობა, 
ერთობ  საცნაური...
მოკლედ  რომ  ვთქვა:
ჩვენი  ნიკა
არის  ციცქნა  სასწაული!..

ნიკას  უყვარს  ჩახუტება,
ცაცუნები  და  ფერება.
მჯერა  -  ნიკა  გადაგვარჩენს
მე  და  ბებოს  დაბერებას!

ნიკას  უყვარს  მუსიკაც  და
ფერხასხასა  ნახატებიც...
ნიკას  ნიჭი  დამილოცოს -
მაღალ  ღმერთს  ვეღაღადები!..

ნიკას  ღიმილებით  სავსე
სიხარულობს  ჩვენი  სახლი...
ბებოს,  ბაბუს  -  მის  შემყურეს,
ზრუნვა-გარჯა  როგორ  დაღლის!

მის  დედიკოს,
მის  მამიკოს,
მის  ბებოებს,
ბაბუ-პაპებს,
ღმერთო,  ერთო,
ამასა  გთხოვ -
ნუ  მოაკლებ  ამგვარ  ღლაპებს!!!

ღლაპია  თუ  ანგელოზი,
საყვარელი  როა  ასე?!.
მინდა  ნიკას  სადღეგრძელოდ
სულ  ხელთ  მეპყრას  თასი  სავსე!

1995. 11.