-ვერ გავიგე, რას ყიყინებ
რას მღერიხარ, ბაყაყო.
ძალიან გთხოვ ფანჯარასთან
მოყიყინე არ გნახო.

აღარ მინდა ყოველ ღამე
"ყი, ყი, ყი, ყის" სმენა,
ვერა ხვდები, რომ არა გაქვს
არც ნიჭი და არც სმენა.

მაგრამ თუკი ძლიერ გინდა
რომ სიმღერა ისწავლო,
ამას გირჩევ. ჩემთან ერთად
მუსიკაზე იარო.

-ნეტა მაგ ცხვირს რას იბზუებ,
რას მეტიჩრობ, თინიკო.
არ წავალო მუსიკაზე,
რომ ტიროდა, ვინ იყო?

ახლა ვითომ ბეჯითივით
რომ შეყარე კოპები,
შენ ისწავლე, თორემ ბაყაყს
არ სჭირდება ნოტები.