საჩხერე

აქ ყველა კვირტში იგრძნობა მარტი,
ყაყაჩოები ჰგვანან ფიალებს
და საჩხერეში თუ იგრძნობ მარტო,
რომ დედამიწა ჭურზე ტრიალებს...

ალიონიდან დაგდევს დღე დროშით,
რძე გამოტენის ღრუბელს ცურივით
და სტუმრის ჯიბრზე ყოველ ეზოში
გალღვება თონე ხაჭაპურივით...

მთები კვლავ ქართულ აკვანს იცავენ,
გთხოვ, ლექსად აქ ნუ წაიწუწუნებ,
ყოველი სახლი აკაკისავით
პოეტებს დღესაც ქართულს უწუნებს.

გზა, დონ-კიხოტი, იგრძელებს კისერს,
ქარი წისქვილებს ებრძვის დღითიდღე,
საჩხერეში ვარ და ვიცი, ისევ
მზე იმერულად ჩაიხითხითებს...

აქ ყველა კვირტში იგრძნობა მარტი,
ყაყაჩოები ჰგვანან ფიალებს
და საჩხერეში თუ იგრძნობ მარტო,
რომ დედამიწა ჭურზე ტრიალებს...


ქუთაისში ვარ

·
დატოვე ეზოს კარები ღია
თუ გულით რამე უნდა ისურვო,
ქუთაისში ვარ და მთელი დღეა
მზე უფრო მეტად ქუთაისურობს...

ქუთათურებთან რად მინდა რუკა,
ხეებზე ტუჩებს თუთა ისველებს
და ვესალმები პატარა შუკებს
- ყველაზე ძირძველ ქუთაისელებს...

სურნელი მათრობს სვანური რახის
რიონიც სადღაც მუდამ მიცურავს,
ჯიბეებში აქვთ ხელები სახლებს
და ჩამუხლულან ქუთაისურად...

დატოვე ეზოს კარები ღია
თუ გულით რამე უნდა ისურვო,
ქუთაისში ვარ და მთელი დღეა
მზე უფრო მეტად ქუთაისურობს...