გავხდები: შენი რიგითი რაი-
ანი თუ მოხვალ გადასარჩენად,
ლეპტოფთან მდგარი უშაქრო ჩაი,
ანდა ნიგოზი გადასარჩევად.
გავხდები: ეზო, შიგ ავი ძაღლით,
შენი ხელ-ფეხის გაზმორვა დილას,
ანდა ერაყში მცოცავი ნაღმი,
ტარანტულებით აღსავსე ქილა.
გავხდები: შენი მეზობლის წყალი,
რომელიც დილით ფანჯრიდან წვეთავს,
რომ მიაწყევლე გუშინ საწყალი
და გაისტუმრე ომალოს, მლეთას.
გავხდები: შენი დესკტოპის ფონი,
წინდებივით რომ ყოველდღე იცვლი...
გავხდები: "მეტი კუთხურის" ფსონი,
რომელსაც ასე უგულოდ ითვლი.
გავხდები შენი გულისთვის ალბათ,
მაგრამ ბევრს ვერა, ასე 3 კილოს...
არც შენ არა ხარ ჯესიკა ალბა
და სცადოს ვინმემ, ერთი გამკილოს.
გავხდები:შენი გამოცვლა ნომრის,
პორტირებული ახალი სიმი...
გავხდები: მტვერი ფქვილიან ტომრის,
რომ აავსებენ წისქვილში სიმინდს.
გავხდები: შენი ქვისლის დეიდა,
მაზლის ბიცოლა ანდა მოყვარე...
ვესტუმროთ ტაოს ან ფერეიდანს,
მერე ვაჩხუბოთ ბრუს ლის ყვარყვარე.
გავხდები: შენი სამსუნგი ტრიდე,
განვადებაზე რომ მოგცა ბანკმა;
გავხდები ფიფა ან სულაც ფიდე,
ლეიბორისტი გავხდები ან "კმა-
რელი" გავხდები, დალახვროს ღმერთმა,
რომლისაც ხშირად ივიწყებ სახელს...
გავხდები: გამა პალიტრის ფერთა,
სადაც გოგენი ტაიტის ამხელს.
გავხდები: ყველა "მილანის" ზანგი,
გინდ ბალოტელი, გინდა მუნტარი...
წინა მედგება მე ერთი ჩანგი,
ვიმღერ, ვიხარებ,-მეფეს უთხარი.
გავხდები: შენი ნანეტი, კარე-
ზაქარიაძე ეტყვის დაუშვილს...
"ხვალამდე მომე მანეთი კარენ,
ბავშვი სკოლაში როგორ გავუშვა?"-
გავხდები: ამგვარ საუბრის მოწმე,
მართლა ტირილი უნდა ავტეხო...
გინდა, გავხდები "ლაგერნი" მოძმე
Deutscheinvestbank-ი გავტეხოთ!!!