პაწაწინა ფრთებით
საით იყურებით?!
თქვენ ხართ ფრინველები,
თქვენ ხართ ბეღურები...

შრიალია ხეთა, 
წვიმს,
თოვსა,თუ
ბარდნის,
გულით დაგაქვთ სევდა,
ფრთებით დაგაქვთ დარდი...

მაინც გაძლეთ,
რადგან,
თუმცა ქარი ქროდა,
თქვენი ფრთების ხელა
საქართველო გქონდათ...

#####

თქვენ რომ დამხატეთ მე მინდა რომ იმ სურათს ვგავდე
და ბილიკებიც ყვავილებით იყოს ნაფენი,
რა უზრუნველი დაგიხატავთ თვალები,სახე,
რა ბედნიერი ღიმილია, სითბო რამდენი?!

აქ კი სიცივეს გაუღია კარები ფართოდ
და მტვერში გდია გაცრეცილი სულ სხვა სურათი,
ავტოპორტრეტი....გაიფიქრებ ოთახში მარტო
და ჩუმი შიში გამეფდება ფიქრის უღრანში...